ماذا لو؟؟ لا قدر الله يعنى - ربنا يدى ريسنا طولة العمر

وانا قاعد بقلب فى المدونات

قريت واحد كاتب عن ان الريس مبارك كان مسك الرئاسة بعد ما كان نائب للرئيس الراحل السادات

وقلت فى نفسى طب هو ليه الريس مش عاوز يعين نائب؟؟؟

عشان هيبقى متأكد انه هو اللى هيمسك بعده؟؟؟

ولا عشان مينفعش يخلى جيمى نائب احسن الطبخة تبوظ

طب يا جماعة حد فكر بجد فى حالة وفاة الريس (اه ممكن يا اخى انت مستغرب ليه كلنا بنموت مش بعيدة يعنى ولا حاجة)

مين اللى هيمسك مؤقتا بعديه؟؟


فى الدستور المصرى (مادة 82)
اذا قام مانع مؤقت يحول دون مباشرة رئيس الجمهورية لاختصاصاته أناب عنه نائب رئيس الجمهورية

طب هو فين النائب هتقولى لا ما فيه مادة تانية هقولك شاطر مذاكر...

(مادة 84)
فى حالة خلو منصب رئيس الجمهورية أو عجزه الدائم عن العمل يتولى الرئاسة مؤقتا رئيس مجلس الشعب، واذا كان المجلس منحلا حل محله رئيس المحكمة الدستورية العليا، وذلك بشرط ألا يرشح أيهما للرئاسة
ويعلن مجلس الشعب خلو منصب رئيس الجمهورية
ويتم اختيار رئيس الجمهورية خلال مدة لا تجاوز ستين يوما من تاريخ خلو منصب الرئاسة

طب كويس قوى الحمد لله ضمنا ان حد هيمسك مؤقت ستين يوم

وكمان ايه مش اى حد دا رئيس مجلس الشعب يعنى راجل محايد وهو اللى مفوضه الشعب عشان يعبر عن حقوقه فيه اجمل من كده

بس ثانية واحدة هو مين رئيس مجلس الشعب؟؟ فتحى سرور؟؟

بسحب كلمة محايد انا اسف

المفروض على الحد ده اللى هيمسك مؤقت انه يبقى محايد عشان يوصل الحكم للرئيس اللى جاى بعد الأنتخابات مباشرة

وبالتالى يضمن عملية انتخابات نزيهة ونضيفة لصالح العائلة الماالكة

بجد لعبها صح ابن الجنيه ها فهمت بقى مين اللى جاى ولا نقول تانى؟؟

احب اسمع تعليقاتكوا ع الموضوع ولو فيه اى خطأ او نقد احب اعرفه

اخر كلام عشان زهقنا بجد عبدربه فى الطريق للأهلى --- والأهلى بيضاعف مكافأت ابطال افريقيا

بصوا بقى اخر كلام ف الموضوع ده لسة اتحاد الكورة المصرى اتلقى قرار من الفيفا بيأكد فيه ان اللاعب من حق ستراسبورج الفرنسى

وبيأمره بسرعة ارسال البطاقة الدولية للأتحاد الفرنسى

هتقولى طب هو كده هيرجع ستراسبورج امال ايه ف الطريق للأهلى ده

اقولك ماهو النادى الفرنسى باع عبد ربه للأهلى بالفعل من قبل ما تحصل المشكلة دى

الا اذا كان اللاعب بقى عاوز يفضل ف الأسماعيلى والنادى الفرنسى يحترم رغبته دى

والله اعلم

بس بجد انا كنت زهقت من الموضوع ده قوى بصرف النظر عن انى اهلاوى صميم بس الموضوع كان خد اكتر من حقه قوى يعنى

واللى عملته القلة من جماهير الأسماعيلى ده مبيحصلش حتى فى كوالالامبور يا جماعة

وع العموم الاهلى كان محتاج اللعيب ده عشان ينشط خط الوسط اللى عنده

من ناحيه تانية وافق مجلس ادارة الهلى انه يضاعف مكافأت الدور قبل النهائى عشان يحفز اللعيبة على الفوز

بعد الأداء الزفت اللى احنا شايفينه بقالنا كام ماتش

خصوصا ان المتش مع الأتحاد الليبى هيبقى يوم 23 اللى جاى ربنا يسترررررررر

احب تشاركونى رأيكم

فهرس المدونات المميزة

WebSite

1. http://meshmesh5000.blogspot.com/ طرطشة افكار
2. http://bentmasreya.blogspot.com/ بنت مصرية
3. http://bmadvice.blogspot.com/ أ..ب...تدوين
4. http://elezba.blogspot.com/ عزبة الحاج ابو جمال
5. http://wanamaly.blogspot.com/ وانا مالى
6. http://catroz.blogspot.com/ I'm Your Mind
7. http://ana-ikhwan.blogspot.com/ انا اخوان
8. http://elfagomy.blogspot.com/ مكنة الفاجومى
9. http://www.manalaa.net/ علاء ومنال
10. http://www.misrdigital.co.uk.tt/ الوعى المصرى
11. http://goldenfleeces.blogspot.com/ الفروة الذهبية
12. http://www.tortureinegypt.net/ التعذيب فى مصر

ميلوووووووودى هى المــــــــــلل

أستخفاف بواخة خنقة مــــــــــــــــــــــلل قلة ادب
هو ده الكلام اللى بيييجى على بالى كل ما اشوف الأعلانات المملة بتاعة ميلودى هى الملل

واحد تخين ماشى عمال يهزأ فى الناس

واعلانات عن قناة ميلودى للكليبات الأجنبى يعنى مش مكفيهم القناتين بتوع الكليبات العربى اللى خاربين الدنيا عاملينلنا قناة اجنبى يا حلاوة
ولا ميلودى افلام بقى بتجيب افلام قديمة ومعتقة

مرة قاعد بتفرج على ميلودى افلام لقيت عرض بيقولك حصريا على ميلودى افلام ولأول مرة على شاشات الفضائيات العربية

انا قلت بقى هيجيبوا فيلم لسة منزلش حتى فى السيما

ببص لقيتهم بيقولوا الواد محروس بتاع الوزير يا سلاااام ع الملل
الفيلم ده اتعرض مش اقل من 17 الف مرة غير ان بقالوا حوالى 10 سنين نازل وكنت دخلته وانا لسة عندى 11 سنة

بجد ارحمونا بقى من الملل ده

عاوز اعرف تعليقاتكم ايه ورأيكم يا جماعة

كده رضا: بجد لو لسة مدخلتوش تبقى عبيط

احمد حلمى نجم الكوميديا الأول فى مصر

اول ما خرجت من الفيلم كلمة واحدة بس كانت على لسانى

حرام دا يبقى فيلم مصرى...

اه بجد ادخله وعلى ضمانتى يا عمونا بس برضك هتلاقى واحد رخم

خارج من السيما يعكنن عليك ويقولك دا تلاقى قصته مسروقة من فيلم اجنبى
هو احنا حرام نعمل حاجة حلوة ونقول عليها حلوة
ع العموم احمد حلمى برىء حتى تثبت ادانته

عاوز اعرف رأيكم ايه ف الفيلم للناس اللى دخلوه

سكتوووووووووووه

طبعا لازم يتقدم ابراهيم عيسي للمحاكمة وتغلق جريدة الدستور المحرضة المجرمة
ازاي يطلع شائعات عن سيادته ..ازاي اصلا يتكلم عن سيادته ..وابنه ....وستنا وتاج رسنا زوجة سيادته
والحمد لله طبقا لتوجيهات زوجة سيادته أن كل اللي صدروا الشائعة بموت أو مرض سيادته حيتقدموا للمحكمة
والحمد لله النيابة والداخلية نفذت أوامر سيادتها علي الفور وقدمت ابراهيم عيسي للمسائلة القانونية
بس ابراهيم عيسي ده مش تهمته بس إشاعة مرض الرئيس لا ده كمان جرناله كله أكاذيب وتحريض ومساندة للجماعة المحظورة اياها
فعلا مجرم ولازم يتحاكم ويفلوا بأه بؤرة الإزعاج اللي اسمها الدستور
عشان احنا نعرف نقرأ بمزاج عالي كتابات كبار الصحفيين المصريين زي استاذنا الفاضل أحمد موسي في الأهرام والكاتب الكبير عبدالله كمال رئيس تحرير أكبر جريدة توزع في مصر روزليوسف والتي يشرف برئاسة مجلس إدارتها الكاتب الذي يتهافت القراءعلي مقاله اليومي كرم جبر ولنتزوق حلاوة صحافة جريدة الوطني اليوم أيضا
وسكتوا بأه الأصوات والأقلام الفارغة اللي بكتب في جرنال الدستور ده عن الفقراء والناس قال ايه اللي اتعرضوا للتعذيب وماتوا وعن المظاهرات الغريبة دي اللي بكتبوا عنها
سكتوووووووه واقطعوا لسانه وكمان ايديه واكسروا قلمه وقطعوا ورقه وحتي ممكن تسجنوه وتسحلوه ولو بالمرة اقتلوه

منقوووول من مدونة (انا اخوان)

http://ana-ikhwan.blogspot.com/

هى الحكومة جادة فى مكافحة الفساد تفتكروا الناس رأيها ايه؟؟؟؟

90%بيقولوا ان الحكومة مش جادة ف مكافحة الفساد

و 6% لسة عندهم امل

فى استطلاع رأى موقع Masrawy.com

حول مدى جدية الحكومة ف مكافحة الفساد

قال 90.4% من اللى شملهم الأستطلاع ان الحكوومة مش جادة

و6% لسة عندهم امل

بس ليه الناس بتقول رأيها بصراحة بس ع النت تفتكروا ليه؟؟

فى استفتاء موقع Filbalad.com عن مصدر شائعة الريس دا اذا كانت شائعة الناس مش عارفة حاجة

قام موقع Filbalad.com بعمل استفتاء حول من السبب فى اطلاق شائعة مرض الرئيس
وكانت اقل نسبة اختيرت هى حماس بنسبة 0.54%
ويليها اسرائيل بنسبة 9.68%
ويليها وسائل اعلام عربية وغربية بنسبة 17.2%
وجاء الأخوان فى المركز الأول بنسبة 18.01%
غير ان النسبة الأكبر التى اختيرت من رواد الموقع هى لا ادرى بنسبة 54.57%

أستطلاع رأى 55% من المصريين راضون عن الأوضاع الداخلية و 49% فقط يثقون فى مبارك

ربما تبدو استطلاعات الرأى فى مصر من الأمور النادر حدوثها على مستوى واسع النطاق وقد يرجع هذا الى نقص الأمكانيات او الخبرات المؤهلة للقيام بهذه الأستطلاعات. ولكن فى الغرب تختلف الأمور كثيرا لأن استطلاعات الرأى تعنى الكثير لكافة المستويات سواء الحكومية او الاستثمارية او حتى على مستوى

المواطن العادى...

عن سؤال الفئة المستطلعة عن مدى ثقتهم بالرئيس مبارك ابدى 49% من المصريين ثقتهم فيه فيما اعرب 3% فقط عن عدم ثقتهم فيه

هتقولى طب ازاااااااااااااى؟؟؟؟؟

هقولك الناس خايفة وده بيشرح الكلام اللى فات كله مش فاهم حتى يعنى ايه استطلاع رأى وفاكر انهم امن دولة....

اما عن مدى رضى الشعب المصرى قال 55% انهم راضون عن سير الأمور حاليا فى بلدهم (يا حلاوة)

بينما قال 42% نهم مش راضيين عن الاوضاع.....

طبعا الأرقام باينة ومش محتاجة فكاكة للأسف احنا ف سنة 2007 وحتى مش عارفين نقول رأينا؟؟؟؟؟؟؟؟؟؟